Izate eta helburua:

Goñiko Udalekuan, gaur eguneko gizarteak eskaintzen dituen baloreez gain gizartean lantzen ez diren hainbat helburu eta ideiei eman nahi diegu tartea... elkarlana, talde lana, hezkidetza etab. Balore guzti horiek, Euskal Herri osoko haur guztiei transmititzea da gure nahia. Goñiko udalekuan lan egiten dugunok, borondatez egiten dugu, proiektuan eta balore horietan sinisten dugulako.

Helburu nagusia, udalekura datozen haur guztiek ondo pasatzea da. Ondo pasatzea bai, baina nola? Euskaraz eta euskal kulturan eta giroan murgildurik. euskara hutsean aritzeko eta bizitzeko aukera badagoela azaldu nahi diegu Euskal Herri osoko haurrei.
Gainera,udalekuak eta Goñiko herriak ematen dituen aukerez baliaturik, balore guzti horiek, naturarekin bat eginik ikasiko dituzte, eta nola ez, berau maitatzen eta errespetatzen.
Natura eta euskarak guztion balore eta ondare izan behar dutelako!!!!!!!

Manu Pirataren mezua

7 itsasoetan barrena ibili ondoren, lortu dut azkenik nire altxor guztiak gordetzeko leku paregabea. Teodosio, Goñiko jauna zenaren eskuetatik jaso nuen bertara iristeko mapa, eta orain zuen eskuetara iritsiko da. Toki izugarri hau ezagutu nahi baldin baduzue jarraitu itzazue mapa honetako pistak.

Non nagoen asmatzen duzuenok zuen zain izango gaituzue, bai ni neu eta baita bertan nirekin bizi diren sorgin, lami eta basoko biztanle guztiak. Manuren piratakide izateko balentria duzuenok, hemen aurkituko dituzue nahi beste altxor, istorio, misterio eta abentura.

Nire itsasontzian zuentzat tokia dago, baina bidaia ez da horren erreza izango, haserrarazten banauzue benetako kortsario bihurtuko naizelako!! JA, JA, JA!!!

Azpiegitura

Baliabide aldetik, 140-160 haur hartzeko azpiegitura trinkoa du Goñiko Dorrekoa Euskal Udalekuak. Horretarako, 3 pisuko etxe sendo eta paregabeaz baliatzen gara; non haur guztientzako ohatzez hornitutako logelaz gain, sukalde, jangela, gaubela gela, eritegi etab. ditugun.

Etxetik kanpo, beste bi zelai ere badira haurren gozamenerako. Herriko frontoian eskuz nahiz palaz pilotan egin daiteke.

Goñi, Andia mendilerroan kokaturiko herri txiki eta lasaia da. Bere kokaguneak aukera bikaina ematen du zenbait mendi irteera egiteko, natura ezagutu, gozatu eta errespetatzen ikasteko; hirian ikusten ez diren animaliak ikusi eta maitatzeko.

Gainera, kondairak dioenez mendilerro honetan bizi izan zen aspaldi batean Goñiko Teodosio zaldun ausarta bizi izan zen. Berak lagunduko digu txoko berak ezagutu eta altxor berriak aurkitzen. Zatoz gure Teodosioren kondaira ezagutzera!

Ekintza bereziak

NATURAREN EGUNA

“Naturaren baitan gara eta natura gara gure baitan”. Hau egunero sentitzen da Goñin, baina hala ere, egun oso bat hartzen dugu honetaz jabetzeko eta gozatzeko ibilaldi bat eginez. Pagadi freskoetan hasi eta haritz urtetsuz jositako goilautada batetik pasatuz Teodosioren lurraldeen ikusmira zabala aurkitzen dugu aurrez aurre. Pagadi itxietara jaitsi eta zelai zabal baten talde jokoak eginez amaitzen dugu ibilaldia. Bide guztian zehar hainbat zuhaitz, landare eta animalien izen, ezaugarri eta aztarnak jolasgai bihurtzen dira.

EUSKARAREN EGUNA

Euskara da udaleku honen izateko arrazoi nagusi bat. Horregatik gure udalekuan konstante bat da euskal kulturaren ezagutza eta hurbiltasuna. Txanda guztian zehar euskara maitatzen eta honen erabilera sustatzen saiatzen gara. Euskararen eguneko ekintzak horretara bideratzen ditugu zuzenean; korrika txikiak, herri kirolak, euskalki festa eta sorpresa ugari!

GAUBELAK

Egun mugituaren ondoren, oheratu aurretik gaubela oparoak egiten ditugu, gaubela-gelan bildu eta haurrek beraiek prestatutako antzerkiak, begiraleok sortutako esketxak, ipuinak eta gure kantak baliatuz amaiera gozoa ematen diogu egunari. Bizpahiru egunetan, eguraldia lagun, gau-suak egiten ditugu, goiko zelaian egindako suaren inguruan bilduta izarpean eginez gaubela.