Gaur jokatu da Bizkaiko aizkolaririk sasoikoenen arteko norgehiagoka, eta Dimako Aitzol Atutxa aizkolari gazteak (18 urte) jantzi du lehen aldiz txapela. Ondorioz, Julen Mendietak iaz lortutako txapela buruz aldatu da, eta, halaber, eskarmentu handiko Lemoarrak (53 urte) lekukoa eman dio, Atutxa gazteari.

Horiek biek izan dute finaleko lehiarik estuena eta txalogarriena. Izan ere, aurreneko zazpi enborretan aurretik aritu da Mendieta, gogor jardunda hasieratik. Azken enborrean, ordea, Atutxa parean jartzeaz gain, aurrea ere hartu dio, eta sasoi egokiagoz heldu denez azken txanpara, dimoztarrak bereganatu du txapela.

Horiekin biekin, Amando Larreak, Unai Aldapek (Dima), Alex Txikonek eta Ernesto Ezpeleta Bihurri-k (Eibar) jardun dute. Guztira zortzi enbor ebaki dituzte; hots, lau kanaerdiko, bi 60 ontzako eta bi oinbiko. Larretxeak plazaratu ditu egurrak. Larreari bi adar bihurri irten zaizkio, eta denbora dezente galdu du.

 

 

1.     Aitzol Atutxa (Dima): 28:48

2.     Julen Mendieta (Lemoa): 29:26

3.     Ernesto Ezpeleta Bihurri: 34:09

4.     Alex Txikon: 36:38

5.     Armando Larrea: 38:00